早餐係旅館包埋，要自8點半後去櫃檯攞，之前已經知道係便當，但估唔到咁好味，d 蔬菜好新鮮，雖然便當唔細份，但都唔覺唔覺食哂，之後仲食埋早一日買落，甜到喊嘅蜜瓜，飽到上心口。
係時候要check out啦，真係好可惜噚晚睇唔到星星，所以決定下次有機會嚟九州會再嚟呢度住。八女除咗星野村出名睇星之外，另外最出名係八女茶，係高級嘅綠茶，而星野村就有間茶嘅博物館，可以俾人品茶，但帶住三隻怪獸去肯定會打擾人哋，所以決定只响販賣店買d茶葉同相關食品返香港享用，再食埋用八女茶造，好香濃嘅雪糕就離開福岡縣，落鹿兒島。
去鹿兒島車程好長，中間經過PA停下車食下嘢，差唔多下晝4點先到鹿兒島嘅霧島市。
我哋今晚住嘅係霧島國際酒店，係比較大型嘅溫泉酒店，check in 上到房三儍見到係tatami就勁興奮，响房度四圍走四圍碌。
到差唔多夠鐘我哋就落餐廳食晚餐，今晚係食buffet，同香港嘅buffet唔同，無生蠔海鮮併盤，取而代之係有㕑師即時煎和牛同炸天婦羅，d嘢好好味，尤其牛肉同刺生好正。食飽我哋就返房換衫，予備去浸溫泉。
酒店有兩個溫泉，分別係本館嘅大浴場同別館嘅露天溫泉，我哋今晚浸本館嘅溫泉，三儍好彩都叫尚算合作，浸完就返房食宵夜休息喇。
（ day 4 完）
沒有留言:
發佈留言